Home சுடச்சுட ‘மெர்சல்’ பட விவகாரம் விஜய்க்கு, பர்கான் அக்தர் ஆதரவு

‘மெர்சல்’ பட விவகாரம் விஜய்க்கு, பர்கான் அக்தர் ஆதரவு

12
0
SHARE

புதுடெல்லி, அக். 24&

நடிகர் விஜய் நடித்து தீபாவளிக்கு திரைக்கு வந்த மெர்சல் படத்தில் மத்திய அரசின் ஜி.எஸ்.டி வரி விதிப்பு முறை, டிஜிட்டல் மணி குறித்து விமர்சிக்கும் வசனங்கள் உள்ளன. இந்த காட்சிகளை நீக்க வேண்டும் என்று பா.ஜனதா கட்சியினர் கண்டித்தனர்.

இவ்விவகாரத்தில் உடனடியாக தலையிட்ட ராகுல் காந்தி மெர்சல் படத்துக்கு ஆதரவான கருத்தை தெரிவித்து உள்ளார்.

இதற்கு தமிழக பாரதிய ஜனதா தலைவர் தமிழிசை சவுந்தரராஜன், இலங்கையில் தமிழர்கள் கொத்து கொத்தாக கொல்லப்பட்டபோது எங்கே சென்றீர்கள் ராகுல்? என்று பதிலடி கொடுத்தார்.

இதனால் மெர்சல் தேசிய அளவில் பிரபலமாகி ஆதரவும், எதிர்ப்பும் குவிந்து வருகிறது. டெலிவிஷன்களிலும் இந்த படம் விவாதப்பொருளாக மாறி இருக்கிறது. எதிர்ப்பு காரணமாக சர்ச்சை காட்சிகளை நீக்க தயார் என்று மெர்சல் பட தயாரிப்பு நிறுவனம் அறிவித்து உள்ளது.

ஆனால் நடிகர்களும் நடிகைகளும் சர்ச்சை காட்சிகளை நீக்க கூடாது என்று மெர்சலுக்கு ஆதரவான கருத்துக்களை டுவிட்டரில் வெளியிட்டு வருகிறார்கள். இவ்விவகாரம் தொடர்பாக ஆங்கில மீடியாவிற்கு பேட்டியளித்து பேசிய பாரதிய ஜனதா செய்தித் தொடர்பாளர் நரசிம்கா ராவ், இந்திய திரைப்பட நடிகர்களுக்கு மிகவும் குறைந்த அளவு பொது அறிவு கொண்டவர்கள் என்றார்.

நரசிம்கா ராவின் இந்த விமர்சனத்தினால் கோபம் அடைந்த இந்தி நடிகரும், இயக்குநருமான பர்கான் அக்தர், டுவிட்டரில் அவருடைய பேட்டியை இணைத்து, உங்களுக்கு என்ன தைரியம்? சார் என கேள்வியை எழுப்பி உள்ளார்.